ສາລະທີ່ຄວນອ່ານ : ປະຫວັດຂອງບຸນອອກພັນສາ

ບຸນອອກພັນສາ ຕິດພັນກັບວິຖີຊີວິດ ແລະ ຮີດຄອງປະເພນີລາວ ມາແຕ່ບູຮານນະການ

      ອີງຕາມຮີດຄອງ ປະເພນີຂອງລາວ ທີ່ເຄີຍປະຕິບັດ ມາແຕ່ບູຮານນະການ ພໍຮອດຕົ້ນເດືອນ 11 (ຕາມປະຕິທິນລາວ), ກົງກັບທ້າຍເດືອນຕຸລາ,ປະຊາຊົນລາວ ທົ່ວທັງຊາດ ກໍພາກັນຈັດພິທີອອກພັນສາ ເຊິ່ງໃນນັ້ນມີການເຄື່ອນໄຫວ ກິດຈະກຳ 3 ຢ່າງທີ່ສຳຄັນ ຄື: ພິທີໃສ່ບາດຖວາຍສັງຂະທານ ແລະ ວຽນທຽນ, ໄຫລເຮືອໄຟ ແລະ ສິ່ງທີ່ຄຶກຄື້ນກວ່າໝູ່ ແມ່ນບຸນຊ່ວງເຮືອປະເພນີ.

ໃນມື້­ບຸນອອກພັນສາ ຍັງມີຄວາມເຊື່ອວ່າ ມີປາ­ກົດ­ການ ບັ້ງໄຟພະ­ຍານາກເກີດຂື້ນ ຕາມແມ່­ນ້ຳຕ່າງໆ ພິເສດ ແມ່ນ້ຳຂອງຈະເກີດມີ ປະກົດການດັ່ງກ່າວ ເນື່ອງຈາກວ່າພະ­ຍານາກໄດ້ຈູດບັ້ງໄຟ ເພື່ອລະ­ນຶກເຖິງສິ່ງສັກ­ສິດ ທັງ­ຫລາຍ ແລະ ໃນມື້­ຕໍ່­ມາ ກໍແມ່ນບຸນ­ຊ່ວງ­ເຮືອ(ທ່າວັນຈັນ).

ບຸນ­ຊ່ວງ­ເຮືອປະ­ເພ­ນີ ແມ່ນກິດ­ຈະ­ກຳໜຶ່ງ ທີ່ປູ່ຍ່າຕາຍາຍຊາວລາວ ເຄີຍປະ­ຕິ­ບັດສືບທອດກັນມາ ແຕ່ດຶກດຳບັນຈົນເຖິງທຸກວັນນີ້, ວັນບຸນດັ່ງ­ກ່າວ ແຕ່ລະທ້ອງ­ຖິ່ນແຕ່ລະແຂວງ ບໍ່ໄດ້ກຳ­ນົດວ່າໃຫ້ຊ່ວງເຮືອ ໃນມື້ດຽວກັນ, ແຕ່ຢູ່ນະຄອນ ຫລວງວຽງຈັນ ແມ່ນໄດ້ຈັດໃນມື້ 1 ຄໍ່າ ເດືອນ 11 ລາວ ສໍາລັບປີນີ້ ແມ່ນກົງກັບວັນທີ 16 ຕຸ­ລາ 2016. ບຸນ­ຊ່ວງເຮືອເປັນບຸນປະເພນີ ທີ່ຫລາຍຄົນຮູ້­ຈັກກັນວ່າ ເປັນກິລາທາງນ້ຳ ຫລື ອີງຕາມນິທານພື້ນເມືອງ ໃນເລື່ອງກ່ຳພ້າຜີນ້ອຍ ເຊິ່ງໃນບາງຕອນ ທີ່ໄດ້ກ່ຽວພັນກັບການ­ຊ່ວງ­ເຮືອ ເຊິ່ງໄດ້ສະແດງອອກ ໃນຕອນເຈົ້າພະ­ຍາ ຢາກໄດ້ນາງງາ ເມຍກ່ຳ­ພ້າມາເປັນເມຍ. ພະ­ຍາໄດ້ເອີ້ນເອົາເສ­ນາອາໝາດ ມາປຶກ­ສາຫາ­ລືກັນວ່າ ເຮັດແນວໃດຈຶ່ງຈະເອົານາງງາ ເມຍກ່ຳພ້າ ມາເປັນເມຍໃຫ້ໄດ້. ໃນທີ່ສຸດໄດ້ອອກອຸບາຍທ້າພະນັນ ກັບທ້າວກ່ຳພ້າ ວ່າຖ້າທ້າວກ່ຳ­ພ້າ ບໍ່ຊະນະຕ້ອງຍົກນາງງາ ໃຫ້ເປັນເມຍພະຍາເລີ່ມ ແຕ່ເອົາໄກ່ມາຕີກັບໄກ່ ທ້າວກ່ຳພ້າ ໂດຍນາງງາ ໄດ້ໃຊ້ແຫວນທຳມະລົງວິເສດ ເສກເຫງັນສ່ຽວຂອງກ່ຳ­ພ້າ ໃຫ້ເປັນໄກ່­ຕີລາຍນ້ອຍ ໃນທີ່ສຸດໄກ່ພະ­ຍາກໍ່ເສຍໃຫ້ໄກ່ທ້າວ ກ່ຳພ້າ ພະ­ຍາເສຍໜ້າບໍ່ຍອມ ຈຶ່ງໄດ້ທ້າຊົນຄວາຍ ແຕ່ກໍ່ບໍ່ຊະນະຄວາຍທ້າວກ່ຳ­ພ້າ, ໃນທີ່ສຸດພະ­ຍາ ກໍທ້າຊ່ວງເຮືອ, ໂດຍນາງງາ ໄດ້ໃຊ້ແຫວນວິ­ເສດ ເສກພະ­ຍານາກສ່ຽວກ່ຳ­ພ້າ ໃຫ້ເປັນເຮືອຊ່ວງ ແລະ ເມື່ອຈະເຖິງຫລັກໄຊເຮືອພະຍານາກ ກ່ຳ­ພ້າ ກໍເອົາຫາງຟາດນ້ຳເປັນຟອງໃຫຍ່ ຈົນເຮືອພະ­ຍາຫລົ້ມ ໂດຍພະ­ຍາກັບເສ­ນາອາໝາດ ໄດ້ຈົມນ້ຳຕາຍໝົດ ແລະ ເຊື່ອກັນວ່າ ນິ­ທານດັ່ງ­ກ່າວ ມີປະຫວັດຄວາມເປັນມາ ຂອງບຸນຊ່ວງເຮືອປະ­ເພ­ນີ ຈົນເຖິງເທົ່າທຸກມື້­ນີ້.

ບຸນຊ່ວງເຮືອ ນອກຈາກເປັນບຸນປະເພນີ ທີ່ຄຶກຄື້ນມ່ວນຊື່ນແລ້ວ ຕາມຄວາມເຊື່ອມາແຕ່ສະໄໝ ບູຮານນະການ ຍັງເປັນການ ສະແດງຄວາມຮູ້ບຸນຄຸຸນ ຕໍ່ດິນຟ້າອາກາດ, ແມ່ນ້ຳ ທີ່ໄດ້ດົນບັນດານໃຫ້ແກ່ ກະສິກອນມີລະດູການປູກຝັງ ແລະ ເກັບກ່ຽວໃຫ້ໄດ້ຮັບຜົນດີ; ສະແດງຄວາມຮູ້ບຸນຄຸນ ຕໍ່ພະຍານາກ ເຊິ່ງຖືໄດ້ວ່າເປັນປູ່ຍ່າຕາຍາຍ ຂອງມວນມະນຸດ ທີ່ດົນບັນດານໃຫ້ຟ້າຝົນເອື້ອອຳນວຍ ແກ່ການຜະລິດກະສິກຳ. ບຸນຊ່ວງເຮືອ ບໍ່ພຽງແຕ່ມີຄວາມໝາຍ ທາງຮີດຄອງປະເພນີເທົ່ານັ້ນ, ຫາກຍັງມີ ຄວາມໝາຍ ດ້ານກິລາ-ວັດທະນະທຳ ແນໃສ່ຮັກສາ ແລະ ເຜີຍແຜ່ໃຫ້ແກ່ຄົນຮຸ້ນສືບທອດ ໄດ້ຮັບຮູ້, ທັງເປັນການເຜີຍແຜ່ ຮີດຄອງປະເພນີອັນດີງາມ ຂອງປະຊາຊົນລາວບັນດາເຜົ່າ ໃຫ້ແຂກຕ່າງປະເທດ ໄດ້ຮັບຮູ້ວັດທະນະທຳ ທີ່ດີງາມຂອງຊາດລາວ ແລະ ບຸນຊ່ວງເຮືອປີນີ້ ຍັງເປັນການຄຳນັບຮັບຕ້ອນ ເຫດການສຳຄັນທາງປະຫວັດສາດຂອງຊາດ ເຊັ່ນ: ວັນສ້າງຕັ້ງ ພັກປະຊາຊົນ ປະຕິວັດລາວ ຄົບຮອບ 60 ປີ ແລະ ວັນສະຖາປະນາ ສປປ ລາວ ຄົບຮອບ 40 ປີ ອີກດ້ວຍ.

ຂອບໃຈ  : ບົດຄວາມຈາກ VTlaos

 

About Devteeno 53 Articles
I AM TEENO

Be the first to comment

Leave a Reply

Your email address will not be published.


*